ភាពយន្តឯកសារអំពីសិល្បករសម្តែងសៀកខ្មែរពីររូបគ្រោងនឹងចាក់បញ្ចាំងជាលើកដំបូង

VOA, Oct. 17, 2020 

វ៉ាស៊ីនតោន — 

ខ្សែភាពយន្តឯកសាររឿង Cirque du Cambodia ដែលស្តីពីសិល្បករ​សម្តែង​សៀកខ្មែរវ័យក្មេងពីររូប គ្រោងនឹងចាក់បញ្ចាំងជាលើកដំបូងនៅថ្ងៃទី២១ ខែតុលាខាងមុខនេះ នៅមហោស្រពភាពយន្តនៃសមាគមអង្គការសហប្រជាជាតិ ឬUnited Nations Association Film Festival។ អ្នករស់នៅក្នុងរដ្ឋកាលីហ្វ័រញ៉ាទាំងអស់អាចចុះឈ្មោះមើលខ្សែភាពយន្តឯកសារនេះដោយឥតគិតថ្លៃ ដែលជាផ្នែកមួយនៃកម្មវិធីអប់រំនៃមហោស្រពនេះ។

 

ភាពយន្តឯកសាររយៈពេល ៩០នាទីនេះ ចំណាយពេលប្រាំបីឆ្នាំដើម្បីថតនៅប្រទេសចំនួន៤។ អ្នកដឹកនាំភាពយន្ត លោក Joel Gershon បាននិយាយថា វាជាសាច់រឿងអំពីក្មេងជំទង់ខ្មែរពីរនាក់គឺ សុខ ឌីណា ​និង​ ណែម​ សុផា ដែល​មកពីភូមិជនបទមួយក្នុងប្រទេសកម្ពុជាដែលជីវិតរបស់ពួកគេត្រូវបានផ្លាស់ប្តូរ បន្ទាប់ពីពួកគេបានចូលរួម «ចលនាសៀកសង្គម» នៅសាលាហ្វារពន្លឺសិល្បៈដែល​ស្ថិតនៅក្នុងខេត្តបាត់ដំបង។

លោក Joel Gershon និយាយនៅក្នុងសារអេឡិចត្រូនិចមកកាន់ VOA ថា៖ «សាលាបង្រៀនសិល្បៈដល់យុវជនដែលអាចដើរផ្លូវខុស មានប្រវត្តិលំបាក ហើយកម្មវិធីទាំងនេះផ្តល់ឱកាសដល់កុមារដើម្បី​ទទួលបានជីវិតប្រសើរមួយ។សាលានេះ​បង្កើតជាសហគមន៍ ការជឿជាក់លើខ្លួនឯង ការច្នៃប្រឌិត ការយល់ពីអ្នកដទៃនិងធ្វើឱ្យពួកគេក្លាយជាពលរដ្ឋល្អក្នុងសង្គម»។

លោក Gershon បញ្ជាក់បន្តថា៖ «ខ្សែភាពយន្តនេះដើរតាមយុវជនពីរនាក់គឺ សុខ ឌីណា ​និង​ ណែម​ សុផា ជាងប្រាំបីឆ្នាំ ខណៈដែលយុវជនដែលមានទេពកោសល្យទាំងពីរនាក់ ទទួលបានអាហារូបករណ៍ទៅរៀននៅសាលាសៀកជាតិម៉ុងត្រេអាល់ដើម្បីហ្វឹកហាត់ និងសម្រេចក្តីសុបិនរបស់ពួកគេដើម្បីក្លាយជាសមាជិកនៃក្រុមហ៊ុនសៀក Cirque du Soleil»។

In full: https://khmer.voanews.com/a/documentary-film-about-cambodian-circus-performers-set-for-world-premiere/5624765.html