​សាកលវិទ្យាល័យ​ជប៉ុន ធ្វើ​ពិព័រណ៍​សិក្សា តាម​អន​ឡាញ សម្រាប់​និស្សិត​កម្ពុជា​

 Rasmei, Oct. 22, 2020

ភ្នំពេញៈ សាកលវិទ្យាល័យ និង​ស្ថាប័ន​អប់រំ​ជប៉ុន​ជាច្រើន នឹង​រៀបចំ​ធ្វើ​ពិព័រណ៍​សិក្សា តាម​អន​ឡាញ នៅ​ថ្ងៃទី​២៤ និង ២៥ ខែតុលា ឆ្នាំ​២០២០ ។ កម្មវិធី​នេះ រៀបចំ​ដោយ​មជ្ឈមណ្ឌល សហប្រតិបត្តិការ កម្ពុជា​-​ជប៉ុន (CJCC) ចាប់ពី​ម៉ោង ៩:០០ ព្រឹក ដល់​ម៉ោង ៥:៣០ ល្ងាច ។​

យោងតាម​សេចក្តីប្រកាស​ព័ត៌មាន របស់ CJCC បានឱ្យដឹងថាៈ ពិព័រណ៍​សិក្សា​នេះ នឹង​ផ្តោតទៅលើ​ព័ត៌មាន ស្ដីពី​ការសិក្សា​ថ្នាក់​បរិញ្ញាបត្រ ថ្នាក់​ឧ​ត្ត​មសិ​ក្សា និង​ក្រោយ​ឧ​ត្ត​មសិ​ក្សា នៅ​ប្រទេស​ជប៉ុន​។ នេះ​ជា​ឱកាសល្អ សម្រាប់​សិស្ស និស្សិត សាធារណជន និង​អាណាព្យាបាល​កម្ពុជា ដែលមាន​ចំណាប់អារម្មណ៍ ឬ​មានបំណង​ប​ញ្ចូ​ន​កូន ទៅ​សិក្សា នៅ​ប្រទេស​ជប៉ុន​។​

​សិស្ស និស្សិត សាធារណជន និង​អាណាព្យាបាល អាច​អញ្ជើញ​ចុះឈ្មោះ ចូលរួម​ពិព័រណ៍​នេះ បាន​ដោយ​សេរី និង​ឥតគិតថ្លៃ តាមរយៈ Zoom និង​ទស្សនា​ការផ្សាយ​ផ្ទាល់ ពី​ហ្វេ​ស​បុក​ផេ​ក របស់​មជ្ឈមណ្ឌល សហប្រតិបត្តិការ កម្ពុជា​-​ជប៉ុន ដើម្បី​មានឱកាស ជួប​ប្រឹក្សា​យោបល់​ផ្ទាល់ ជាមួយនឹង​អ្នកតំណាង មកពី​សាកលវិទ្យាល័យ​ល្បីៗ នៅ​ប្រទេស​ជប៉ុន និង​អ្នកតំណាង មកពី​ស្ថាប័ន​ផ្សេងៗ ដែលមាន​វត្តមាន ក្នុង​ពិព័រណ៍​នេះ​។​

In full: https://www.rasmeinews.com/archives/380532