Jeffrey Epstein មហាសេដ្ឋី​អាមេរិក​​​ជាប់ចោទ​ពីបទ​បំពាន​ផ្លូវភេទ​ស្ត្រី​ ស្លាប់​​ក្នុង​គុក

by RFI
August 11, 2019

មហាសេដ្ឋីអាមេរិកវ័យ៦៦ឆ្នាំ​ ឈ្មោះ Jeffrey Epstein ដែលជាប់ចោទពីបទរំលោភបំពាន​ផ្លូវភេទ លើស្ត្រីវ័យក្មេងជាច្រើននាក់ ហើយដែលថ្ងៃសវនាកា ជិតចូលមកដល់នោះ ត្រូវបាន​គេប្រទះឃើញស្លាប់ ក្នុងបន្ទប់ឃុំឃាំង នៅ​ពន្ធនាគារក្រុងញូយ៉ក។ បើតាមការសន្និដ្ឋានបឋម ការស្លាប់នេះ ទំនងជាករណី​ធ្វើអត្តឃាត។ តែយ៉ាងណា FBI នឹងស៊ើបអង្កេតស៊ីជម្រៅ ដើម្បីស្វែងរកការពិត ជុំវិញការស្លាប់នេះ ព្រោះថាសវនាកា កាត់ទោសជននេះ អាចជាប់ពាក់ព័ន្ធ ជាមួយមនុស្សគ្រាក់ៗមួយចំនួន នៅសហរដ្ឋអាមេរិក។

ដំណឹងស្តីពីការស្លាប់ របស់​មហាសេដ្ឋីអាមេរិក Jeffrey Epstein ដែលជាប់​ចោទពីបទបៀតបៀនផ្លូវភេទលើអនីតិជន បានធ្វើឲ្យគ្រប់គ្នាស្រឡាំងកាំង ជាពិសេស ជនរងគ្រោះជាច្រើននាក់ ដែលកំពុងរងចាំសវនាកា​ កាត់ទោសជននេះ។ យោងតាមរដ្ឋបាល​មន្ទីរឃុំឃាំង ក្នុងសង្កាត់ម៉ាន់ហាតាន់ ក្រុងញូយ៉ក ដែលបញ្ជាក់ប្រាប់កាសែត New York Times បាន​ឲ្យដឹងថា នៅវេលាម៉ោង ៦និង៣០នាទីព្រឹក ថ្ងៃសៅរ៍ទី​​១០សីហា ជនជាប់ចោទឈ្មោះ Jeffrey Epstein ត្រូវបានគេប្រទះឃើញស្លាប់ ដោយចងក នៅក្នុងបន្ទប់ឃុំឃាំង។ ប្រភពពី​មន្ទីរឃុំឃាំងដដែល បញ្ជាក់ថាបើពិនិត្យមើលពីខាងក្រៅ គឺការស្លាប់នេះ ទំនងជាការធ្វើអត្តឃាត។
Read full article